بسم الله الرحمن الرحيم
النهارده موضوعنا عن أحسن الموبايلات مقابل السعر في مختلف الفئات السعرية
في السوق المصري. طبعا أساس اختياراتي محصور على الامكانات مقابل السعر لا
أكثر و لا أقل. و لكن زي ما كلنا عارفين, لولا اختلاف الأذواق لبارت
السلع. لو انت بتحب الموبايل يكون flip اشتري واحد flip... هدف الموضوع بس
انك تكون عارف الأول مدى زيادة السعر و نقص الامكانات اللي انت هتدفعهم
مقابل الحصول على الجهاز اللي يناسب ذوقك...و بالتالي مدى جدوى شراؤه.
نخش بقى في الموضوع.
0-200 جنيه:
في الرينج ده, متتوقعش انك
تلاقي غير الامكانات الأساسية زي اللي في النوكيا 3310, و لكن قبل ما أقول
لك توفر فلوسك و تشتري أرخص حاجة تلاقيها, ففيه بعض العوامل اللي ممكن تخليك تدفع أكتر في الجهاز حتى لو مفيهوش امكانات زايدة عن التاني:
فيزيائيا: صغر الحجم, جمال الشكل, جودة التصنيع.
الشاشة: كونها ملونة أو أبيض و أسود, و كثافة النقط, و مدى وضوحها و اضائتها.
السوفتوير: مدى سهولة التعامل معاه, و سرعته, و شكله.
مدى وضوح الصوت في المكالمات.
قوة البطارية.
أجهزة النوكيا و السامسونج بشكل
عام هتلاقيها غالية بدون مبرر و بسبب كده أنا صعب أرشحها. الأجهزة اللي
ملهاش صيت كبير زي ألكاتيل هي اللي هتلاقي أسعارها كويسة مقابل امكاناتها.
أفضل الأسعار هتكون غالبا في
العروض اللي بتقدمها موبينيل و فودافون و اتصالات, و لكن قبل ما تقدم على
شراءها اعمل حسابك انك متقدرش تركب خط موبينيل أو اتصالات في عدة فودافون,
و نفس الكلام هيحصل لو انت اشتريت جهاز جاي معاه خط من موبينيل أو اتصالات.
200-500:
أنا أرشح في الرينج ده جهازين:
Nokia 1650:
شكله شيك جدا, و فيه ميزة جميلة و هي الراديو...كل ده ب250 جنيه.
Alcatel OVT-V770:
ب485 جنيه انت بتحصل على تحفة فنية سمكها 1سم فقط من الشركة الفرنسية ألكاتيل, و مش كده و بس...انت كمان هيبقى معاك:
- شاشة 1.9 بوصة بدقة ممتازة.
- كاميرا 1.3 ميجابكسل,
أي بتلقط حوالي 4.5 أضعاف التفاصيل اللي بتلقطها الكاميرات الVGA, و كمان
تقدر توصلها بالكمبيوتر و تشغلها webcam.
- قابلية تصوير الفيديو بعدد ساعات مش محصور بشيء غير حجم الميموري المتبقية.
- مشغل أغاني تقدر
تسمعه في الhandsfree (سماعات الودن) و الloudspeaker, و معاك ميموري 2
جيجا جاية مع الموبايل تقدر تخزن عليها كل الأغاني و الفيديوهات اللي تحلم
بيها.
- Bluetooth, و ده صعب تلاقيه في جهاز بالسعر ده.
- دعم كامل لبرامج الجافا (زي Opera و e-Buddy) و ألعاب الجافا.
500-750:
لا يوجد. كل العدد في الرينج ده امكاناتها متتعداش الAlcatel OVT-V770:
الSamsung E250 كاميرته VGA (أي 0.3 ميجابكسل) و شكله أوحش و شاشته دقتها أقل بكتير...
الNokia 3110c شكله هو
كمان أوحش و شاشته دقتها و جودتها هي كمان أسوأ بكتير من الAlcatel
OVT-V770. و ب625 جنيه أنا معتقدش انه صفقة جيدة أبدا.
برضه ال3500c يتقال عليه
نفس الكلام اللي اتقال على ال3110c. يمكن الكاميرا فيه أحسن شوية لأنها 2
ميجابكسل و لكنها متستحقش 700 جنيه...
750-1000 جنيه:
مفيش عندي غير ترشيح واحد بس و هو الSamsung D900i ب900 جنيه:
ايه هو الD900i؟ سؤال
وجيه جدا. الD900i بالمختصر المفيد هو تحديث للD900 اللي كان رد Samsung
المباشر للNokia N73. لو ده ملفتش نظرك, يبقى ممكن حصوله رسميا على جايزة
أفضل موبايل لعام 2007 (هو و الK800) ممكن يخليك تنتبه أكتر على اننا
بنتكلم على واحد من أكتر الأجهزة احتراما و شهرة في العالم.
الشكل: اما يعجبك أو ما يعجبكش. و لكن محدش يقدر ينكر مدى رفع الجهاز.
جودة التصنيع: هي اللي ممكن تتوقعها من جهاز كان في يوم من الأيام أفضل جهاز بتقدمه سامسونج.
الشاشة: بنفس دقة الN73 (الاتنين 240×320 بيكسل) و لكن الD900i جودة شاشته أحسن من ناحية الاضاءة و الوضوح كعادة شاشات سامسونج.
الصوت: الD900i هو كمان
كعادة موبايلات سامسونج جودة صوته أحسن من كل المنافسين. و فيه معلومة
ظريفة جدا أنا لقيتها في gsmarena.com هي ان الApple iPhone اللي ب4000
جنيه بيستعمل شرايح صوت من تصنيع سامسونج, و بالتالي فصوت الD900i هو نفس
صوت الiPhone.
الكاميرا: باخنصار, هي تقريبا بنفس مستوى الN73.
عمر البطارية: قصير شوية لأن حجم الجهاز صغير, و بالتالي فالبطارية كمان حجمها صغير نسبيا.
الأسباب الرئيسية ان الجهاز سعره منخفض للدرجة دي هي:
1) أجهزة سامسونج ملهاش
سوق كبير و بالتالي هي بتتباع بسعرها العالمي. و لكن بالنسبة للنوكيا,
فالتجار عارفين انهم حتى لو بالغوا في السعر الناس برضه هتشتريه.
2) الD900i مفيهوش 3G. ده هيفرق معاك بالذات لو انت بتحب تقعد عالنت كتير.
3) السوفتوير محدود الى
حد كبير. هو فعلا يدعم الجافا و لكنك مثلا محصور في اختيار الثيمات على
اللي جاية مع الجهاز. و لما تصور, مش هينفع تنزل الصورة مباشرة على
الmemory card. لازم الأول تنزل على memory الجهاز و بعدها تنقلها بالfile
manager للmemory card. و متقدرش تعمل playlist من أكتر من 20 أغنية...و
هكذا.
بالنسبة للموبايلات المنافسة في الرينج ده:
الN72 مينفعش يتقارن
بالD900i لا من ناحية الشكل و لا الشاشة و لا الصوت و لا الكاميرا و لا أي
حاجة خالص. حتى السوفتوير في الN72 الsymbian يعتبر عيب مش ميزة لأنه
بيبطأ أوي الجهاز.
و ال3120c هو كمان مفيهوش أي حاجة تميزه عن الD900i.
و لا ال5220.
و لا ال6131.
و لا الK610.
و لا الK550.
و لا ال...
1000-1500 جنيه:
فيه أجهزة كتير في الرينج ده ممكن تترشح و لكني شخصيا شايف انك اما توفر و تشتري الD900, أو تزود و تشتري الN78.
1500-2000 جنيه:
N78 ب1750 جنيه, و بلا منازع.
الموضوع هنا أصغر من اني أقدر أوفي الN78 حقه, و عيوبه و مميزاته بقت
معروفة هنا في مصر و بالتالي فأنا مش هعلق عليه.
2000-2500:
N82 و لكن صعب أرشحه لما ألاقي الN78 أرخص منه ب700 جنيه, و الN85 خلاص قرب ينزل..
2500-3000:
غالبا هيكون الN85 لما ينزل.
3000-؟؟؟
رأيي انك تبتدي تجزأ لأنك
مهما صرفت فانت في الاول و الآخر بتشتري موبايل له حدوده و عمره ما هيقدر
يعوض الأجهزة اللي هو بيقوم بمهمتها بصورة مثالية:
عمر ما جودة الصوت هتبقى بمستوى جهاز iPod أو Cowon.
عمر ما كاميرا الموبايل هتكون بمستوى الكاميرات الديجيتال, و ده بسبب صغر حجم العدسة و السينسور في كاميرا الموبايل.
عمر ما الألعاب هتبقى بمستوى جهاز Sony PSP أو Nitendo Gameboy.
عمر ما تصفح الانترنت هيبقى ممتع زي لما تقعد عليه من لابتوب.
و هكذا.
الرئيسية 
